"Sprüch"
Es isch d'Wält in dr Coranavirusphase und es zeigt
d Frau Fasnacht uns die
langi Naase.
Dr Waggis haltet da Joor siini grossi Schnuure und dr Harlekin lauft ganz
still duure.
Em Pierrot kullere Dräne uss de Fasnachtsauge und e alti Dante kaa als das
Gschee zer Zyt nid glaube.
Piccolo und Drummle bliibe da Joor ganz still und stumm und dr Dummpeter
isch da Joor, wirgglig dr Dumm.
Gugge wird verbote durch Gasse z'schränze und niene dien scheeni und bunti
Goschdym glänze.
Drzue liigt daa Joor weder Orange- noo Mimoseduft, in dr Basler Fasnachtsluft.
Soo saage au mir scho vor de drey scheenschte Dääg adieu Fasnacht in däm
Joor und hoffe, Du stoosch im 2021 wider z Basel vorem Fasnachtsdoor.
Es bluetet bis deert aahne e mäng mäng Fasnachtshärz und es verrisst fascht
e jede Basler hit vor Schmärz.
Doch e woore Fasnächtler isch zwoor jetzt grad druurig und au muff, doch
kurz vorem Änd stoot är den ganz sicher fir die negschti Fasnacht wider uff.
-
Ob Harlekin, Ueli oder Waggis mit langer Naase,
alli underliige im 2020 dr Coronavirusphaase.
D Frau Fasnacht duet uns dr Rugge aahne stregge, uff dass sich e jede
Fasnächtler derhinter kaa verstegge. Soo duet das Virus uns hoffentlig nid
noo länger blooge und iischrängge, uff dass mir nägscht Joor unser Wäägeli
wider kenne iiber d Cortègeroute längge. All unsere Frinde wiinsche mir
gueti und virusfreyii Zyte, uff dass nägscht Joor Basel wider wird s Liecht
abmacht wenn s am Mändig am Morge duet Vieri lyyte.
-
Iistoo, Ändstraich, fertig und tschau, es sitzt d
Frau Fasnacht isoliert im Bau.
Uuse darf sii daa Joor nid, es isch kaii Spass, es bliibe d Stroosse läär
und jedi Gass.
Uffem Minschterplatz wird das Joor kaii Ladäärnemeer erstrahle in siim
Glanz und ganz Basel wird drey Dasg sii e Totedanz.
Näggscht Joor kunnt d Frau Fasnacht (hoffentligg) wider zrugg uff Basel, dr
Stadt am Ryy, mer wärde sii erwarte und steehn mit Larve und Goschdym, denn
wider ii.
