S blyybe Piccolo und Drummle stumm, s isch uss und verbyy

Denn d Frau Fasnacht erliggt, dr Pandemie.

D Frau Fasnacht het uns in däm Joor uff ai Schlaag verloo

Und männg Fasnachtshärz, het uffgheert z schloo.

Statt dr Larve in Gugge und Clique, oder uff Schääse und em Waggiswaage,

Duet mer jetzt in dr ganze Stadt, e Massge draage.

Gschpängschtig still isch Basel ohni Fasnachtsglanz

Und me dänggt unweigerlich an Pandemie und Dootedanz. 

Fasnacht 2021

Dr Karl Lagerfäld het uns faarblig inspiriert und fasziniert,

Doch statt ins Sujet, hän mer in däm Joor nur in Impfstoff, investiert.

D Frau Fasnacht het scho frie erkennt, dass es widerum wird kai Fasnacht gee

Und e jede Fasnächtler duets uff syyni ganz aigeni Art, zer Kenntnis nee.

Solidarisch dien d Fasnächtler dr Entscheid vom Comité doo akzeptiere

Und nur in glainschtem Raame e weeneli Fasnacht uff privatem Boode zelebriere.

Larve gheersch in däm Joor laider niemer saage,

Denn noo immer duet mer in und um Basel die hygienisch, cleane Massge draage.

Fasnacht 2022

S gyt e Fasnacht, nai doch nid, oder doch oder doch eher nid?

S kunnt e männge bii de erschte Uussaage, gar nid rächt mit.

Doch langsam kunnt s Liecht vom Tunnel e weenig neecher und in Sicht,

Soo entfallt langsam, aber sicher denn, au d Massgepflicht.

Gugge und Clique broobe jetzt scho ganz versässe,

Doch es blyybe d Wääge und Schääse derbyy vergässe.

Au dr Goorteesch duet s Comitè nit organisiere und duurefiere,

Drumm noonemool e Dangg, dass mer am Gugge- Stärnmarsch hän deerfe mitmarschiere.

Fasnacht 2023