"Sprüch"
Unseri Goschdyym hätte im 2022 scho noo passt wie mee het kenne gsee,
doch laider hets au fir uns in däm Joor, kai Fasnacht gee.
Im 2022 het mer s kenne keere und draaie wie mee will,
um und uff de Bauplätz voo de Waggis und ihrne Wääge ischs läär und still....
D Frau Fasnacht het zwoor gsait sii kunnt zrugg zu uns an d Fasnacht und an Ryy,
nur sinn im 2022 d Wääge und Schääse nid derbii.
E kleine Wäägelizuug het mee probiert zem duurefiere
und chlii fasnächtlich durch d Stadt z spaziere.
Doch d Fasnachtsstimmig isch nid soo richtig duuredrunge
und soo isch au bii uns dr Funke, nid soo wirgglig iibergsprunge.
Fir jungi Pfyffer und Dambuure ischs aber sicher e guete Aasatz gsii
und sii sinn musikalisch sicher parat und gärn derbyy.
Au Gugge hän deerfe schränze und ihr Kenne bewiise,
sowie d Schnitzelbängg Pointe singe voo ganz diräggt bis hii zu de spitzig liise.
Nur dr Waggis isch fascht stumm bliibe und het nur verainzelt sich durch d Stroosse driibe.
Doch kaii Angscht, d Frau Fasacht het dr Waggis, d Wääge und d Schääse nid vergässe
und isch uns derbyy emol koo bsueche, da sii ihri verloorene Fasnächtler isch, bii uns koo sueche.
Nadirligg hän mir gholfe und Alli gfunde woo d Frau Fasnacht het loo sueche
und soo keere im 2023 alli zrugg zer Fasnacht, genau eso wie mir,
Eyri "Hörnli- Rueche".
