"Sprüch"
Dr Bundesrot und s Comitè sinn sich
mol aiinig
Und sii verdräte zämme, die glyychi
Meinig..
Soo gyts in Folg voo dere Corona-
Pandemie,
Erneiit kai Fasnacht, bii uns am
Ryy.
Wenns denn am Mändig dr 22.Hornig
2021 am Morge vieri schloot,
In dr Basler Innerstadt s Liecht,
niene ussgoot.
Statt bunte Ladärne und strahlende
Kopfladärnli,
Funggle nur am Himmel oobe, e paar
Stärnli.
Jetzt fangt in Basel zem zwaite mol
„kai Fasnacht“ aa,
Und e woore Bebbi, haltet sich draa.
Denn statt Schnitzelbängg singe und
Sujet entfalte,
Gilt Masgge draage und Abstand
halte.
Druurig sitzt e Pierrot in dr Freie
Strooss uffem Troittwarrändli
Und es kullere ihm e paar Dräänli
iiber sii scheen Fasnachtsgwändli.
Noo nid mol aagfange und doch schoo
wider vorbii,
Naii, druuriger kennt, kai Fasnacht sii.
Doch nid nur dr Pierrot in dr
„Freie“ duet d Fasnacht misse,
Sondern alli, woo gärn imme Clique-
Käller hätte in e Kääs- oder Ziibelewaie iine bisse.
Denn au all die scheene Käller sinn
und bliibe au in däm Joor zue
Und es herrscht statt
Fasnachtsdriibe, e gspängschtigi Rueh.
Am Fischmärt uffem Rand vom Brunne,
Sitze e Harlekin und findets
gspunne.
Kai Pfyffe, kai Ruesse, nid isch z
gheere,
Nur s Rusche vom Ryy, duet d Stilli
steere.
Au in de Gässli bliibts wohl drey
Daag lang still,
Will mee joo niemer ärgere und
gfäärde will.
Kai Gugge wird am Seibi, Märt- oder
Claraplatz schränze
Und kai Guggemajor im strahlende
Liecht uff dr Biini glänze.
Still stoot e Harlekin vorere
gschlossene Beiz und duet sinniere,
Normal wurde mer hit doo in dr
Clique gmeinsam dinniere.
Doch da Joor deerfe mer uns joo nid
emol in dr Gruppe zämme gselle
Und soo duet sich wohl e jede, siini
Pizza Haime bstelle.
Voreme gschlossene Glygge- Chäller
stoot e Gruppe in Gedangge versungge,
Wie gärn hätte mer doch zeme guete
Schnitzelbagg e „Waggis“ drungge.
E fiine Wind duet derbii durch Basel
bloose
Und immerhin kasch Schnitzelbängg,
uff Tele Basel loose.
E Blätzlibajass hoggt uffeme Bänggli
an dr Pfalz
Und gniesst ussem Fläschli, Hopfe
und Malz.
Au är wurd sich lieber mit siiner
Drummle durch Baseler Gasse zieh,
Mee merggt, siini Drääne zrugg z
heebe macht ihm rächt Mieh.
Menscheleer sinn derwiil die
mittleri- und d Wettstaibrugg,
Wäärend drzwische d Fääri still dr
Ryy queert hii und zrugg.
Vergääbens versuecht mee e paar
Deenli voo dr Fasnacht z gheere,
Denn niemer duet sich geege die
verordneti „kai Fasnacht“ weehre.
E Ueli stoot wie ussem nid mitts
uffem Seibi mit siiner Posuune
Und versetzt deert d Lyt, e weehneli
ins stuune.
Gueti Luune duet är doo allewiil
verbraite,
Au wenn ihn kai gspiilts Deenli ihn
duet beglaite.
Sinni Kollege duet är in de nägschte
drey Daag scho arg vermisse,
Au in e heisse Klöpfer hät är doo
bim Seibi hite ganz gärn bisse.
Doch da Joor soll ebe nomol Alles
anders syy,
Denn es gyt kai Fasnacht, in unserer
Stadt am Ryy.
E Drämlichauffeur maint denn doo scho
fascht e bitz schockiert,
Nid aii Fasnachtswaage het mii
Drämli uff de Schiine hite blockiert..
Soo duet e jede uff siini Art, d
Fasnacht vermisse
Und e mängs Fasnachts- Härz, hets
bis doo aane schoo verrisse.
E wietige Waggis stammpft in sinne
Zoggeli iiber dr Mässeeplatz,
Woo ihm e Jede wie annere Fasnacht
macht, grad e chlii Platz.
Doch ungwohnt still und wortloos
goht är doo duure,
Was wohl an dr Masgge liggt, woo är
drait um d Schnuure.
Soo feehlt nääbem Intregiere vom
Waggis au die viile Wääge,
Genausoo wie dr scheeni und bunti
Räpplirääge.
Es danze somit kaini Räppli und
Fanachtsbändeli in unserer Luft,
Woo ebefalls duet feehle dr Mimösli-
und Orangeduft.
Uffem Claraplatz dien abstandhaltend
au mir „Hörnli- Rueche“,
Wiiderum nach de passende Wort zur,
„kai Fasnacht“ sueche.
Soo hoffe mer doo jetzt voller
Zueversicht,
Dass ihr im 2022 doo wider kenned
lääse, e Fasnachtsbricht.
Griezii und Adieu Frau Fasnacht,
saage mer doo zer glyche Zyt
Und hoffe dass es am 07.März 2022
denn ändligg iwder isch woorlig sowyt.
Denn soll in Basel wirgglig wider
Fasnacht syy,
Woo bestimmt Alli sinn, wider
derbyy.
Denn es solle Harlekin, Ueli, Waggis,
alti Dante und alli Andere Figuure wider ufferstoo
Und d Fasnacht in unserer scheene
Stadt, ufflääbe loo.
In Basel soll dr Bebbi wider drey
Daag deerfe in Larve und Goschdym glänze,
während mee s gheert pfyffe, ruesse,
intregiere und schränze.
Bis deert aahne diend guet zu Eych
und Eyre Liebschte luege damit s stets lauft rund
Und vorallem, dass isch sehr
wichtig, hebet Sorg und bliibet gsund.
Mer hoffe, ihr könned uns an dr
Fasnacht 2022 am Zyschtig Oobe uffem Claraplatz denn wider koo deerfe bsueche,
Sali zämme, Eyri „Hörnli- Rueche“.
